Deu 32 | ZomZIV | STEP | Vante aw, na ngai un kong gen ding hi; Leitung aw, ka kammalte na za in.

Deuteronomy 32

1 Vante aw, na ngai un kong gen ding hi;
Leitung aw, ka kammalte na za in. ^a
2 Ka hilhna guahmal bangin kia henla,
ka kammalte daitui bangin taak hen;
lopa sel tungah guahphin bang henla,
singno dawngte tunga guahzu bang hen. ^b
3 TOPA min ka tangko ding hi. ^c
Oh, eite Pasian liatna phat un! ^d
4 Amah Suangpi hi a,
a nasepte kicingin a lampi khempeuh thutang ahi hi. ^e
A muanhuai, a khial lo Pasian,
thudikin thutang hi. ^f
5 Ama tungah amaute a siattat uh hangin a maizum nading uh hi a,
ama tate hi nawn loin
lungsim kawi le lungsim khel khang mite ^{▼▼32.5 Ahikeh amuate a kisiasa, a tate ahi nawnlo / amau maizum nadingin a tel a kihuihek khang mite ahi hi.} ahi uh hi. ^h
6 A hai, a pil lo mite aw,
TOPA na thuk kik nading uh hih bang lam mah hiam? ⁱ
Amah note hong bawl hong siam,
hong Piangsakpa ^{▼▼32.6 Ahikeh note hong puak Pa} na Pa uh hi lo ahi hiam? ^k
7 Tanglai hunte phawk unla;
sawtpek lai-a khangte ngaihsun un. ^l
Na pa dong lecin hong gen dinga,
na upate uh dong lecin hong ciangen ding uh hi. ^m
8 Sangpen Pa in minamte amau luah ding pia a,
mihing khempeuh a hawmsak lai-in
Israel’ tapate ^{▼▼32.8 Masoretic Si Tuipi Laizialte (Septuagint zong en in) ah Pasian tapate} a phazah tawh kizui-in
mite ading gamgi a phuhsak hi.
9 TOPA’ tanh ama mite hi a,
ama luahdinga a tanh Jacob ahiman ahi hi. ^o
10 Sehnel leitang gam kolh lakpi
a thum duldul leikeu munah amah mu hi. ^p
Amah dalin kema;
amit nauta bangin cinga, ^q
11 a bu tokin, a note tungah kha a zap,
a note man dingin a kha a zak,
a khaveng tungah
a note a pua zel muvanlai tawh kibang hi. ^r
12 TOPA bek in amah pi-a;
pasian dang in a ompih kei hi. ^s
13 Leitang asannate ah amah tuangsak a,
lo pana gahte in a vak hi.
Suangpi pana khuaizu le
meisuang heng pana sathau, ^t
14 bawnghon le tuuhon panin
tuuno le keelno vakthaute le nawitui le nawithau-khal,
Bashan tuutal limcipente le
mangbuh vui tualpenin amah a vak hi.
Nang in a phuan seuhseuh lenggah sisan na dawn hi. ^u
15 Jeshurun ^{▼▼32.15 Jeshulun a khiatna a dingtangpa, tua pen Israel} hong thau ta in hong lehpeek ta a,
an hau in, gik lihliahin a mam pingpeng hi. ^w
Amah a bawlpa Pasian nusia-in,
ama Honpa Suangpi a nial hi. ^x
16 Amaute in a gamdang pasiante uh a hazasak uh a,
amau milim kihhuaite in a hehsak uh hi. ^y
17 Amaute in Pasian ahi lo dawite-
a theih ngei loh uh pasiante,
a piangtawm pasiante na pate uh kiktak loh pasiante tungah
biakna a pia uh hi. ^z
18 Note ta-a hong nei Suangpi na taisan uh a,
no hong senkhia Pasian na mangngilh uh hi. ^aa
19 TOPA in hih mu a,
a tanute a tapate in hehsak ahi manin amaute a nolh hi. ^ab
20 Amah in, “Amaute pan ka maitang ka sel ding hi; ^ac
amaute lungsim kawi khangmite hi uh a,
a muanhuai lo tate ahi manun
a tawpna ah bang a suak uh hiam, ka en ding hi.
21 Amaute in pasian ahi lo tawh hong hazasak uh a,
kimanna nei lo a milim un hong hehsak uh hi.
Kei zong tuate mahin mihing a hi lote ka engsak dinga;
bangmah a thei lo minamte-in amaute ka hehsak ding hi. ^ad
22 Ka thangpaihna in mei tawhkuang khin ahi manin
sihna ^{▼▼32.22 Hebrew ah Sheol} leinuai gam dong a kang hi.
Tua in leitung le a ante hultum dinga,
mualte bulpite a kuangsak ding hi.
23 “Amaute tungah tuahsiatna ka sungvum dinga,
amaute langkhatah ka thaltang ka kap ding hi. ^af
24 Kialpi-in amaute ka zuukmang dinga,
a haltum natna le sihtheihna pulpi ka tungsak ding hi; ^ag
amaute lang khatah a hahiam gamsate le
leivui laka awmtal a gupha ngante ka sawl ding hi.
25 Namsau in kongzing lakah amaute ta nei loin omsak dinga,
a inn uh launa in a uk ding hi.
Nungakte le tangvalte naungekte le
samkangte a simang ding uh hi.
26 Amaute ka thehthang dinga,
mihing kiphawk khakna panin ka phiatmang ding hi, ka ci hi. ^ah
27 Ahi hangin lah a galte un a galte uh phinin,
‘Ko khut mah a gualzo hi;
hih khempeuh TOPA sepsa hi kei,’ ci-a
a theihkhialh ding ka lau zel hi,” a ci hi. ^ai
28 Amaute ngaihsutna nei lo minam hi uh a,
amaute sungah thu theihkakna a teng kei hi. ^aj
29 Amaute pil tapeuh in hih thu theitel uh henla,
a tawpna ah bang suak ding cih thei le uh maw! ^ak
30 Suangpi in amaute tungah zuak kei henla,
TOPA in amaute piakhia lo hileh
bangci in mi khat in tul khat nungdelhin,
mi nih in tulsawm lausak ding ahi hiam? ^al
31 Ahang in, i galte nangawn in a theih mah bangun
amau’ suangpi le ei Suangpi a kibang kei hi. ^am
32 Amau lenggui Sodom pan le
Gomorrah a lote pana pai ahi hi.
A lenggahte uh gu tawh kidima,
a lenggah bawkte uh khaatna tawh kidim hi. ^an
33 A zu uh gulpite gu hi a,
sihtheihna sokval gu ahi hi.
34 “Hihte koihkhol gige-in
ka vankholna ah sincip lo ka hi hiam?
35 Phulakna kei aa hi a;ka thukkik ding hi.
Mailam hunah amaute khe tal dinga;
amau tuahsiat ni ding nai-in
amau tungah siatna a tungpah ding hi,” ^ao
36 TOPA in a mite thahatna bei-in
sila le sila lo khat beek a om nawn loh a muh ciangin,
a mite tungah thu khen dinga,
a nasemte a khuatuah ding hi. ^ap
37 Amah in amaute’ pasiante,
amau bukna suangpi,
38 a kithoihna uh sathau ne-a,
dawntheih-a biakna uh a dawn pasiante tu-in koi-ah om ta hiam?
Hong huh dingin hong tho uh hen!
Note hong liah dih uh hen!
39 “Tu-in en un, keimah in Amah ka hi hi!
kei longal Pasian dang a om kei hi.
Ka that-a, ka nungtasak hi,
ka liamsaka, ka damsak ding hi;
ka khut panin kuamah in a hukhia thei kei hi. ^aq
40 Vantung lamah ka khut lamto in:
ka nuntak tawntung laisiah
41 ka namsau taatin ka teesak a,
thukhen dingin tua ka mat ciangin
ka galte tungah phu ka la dinga,
kei hong mudahte ka thuk kik ding hi. ^ar
42 Ka thaltangte sisan ka khamsak dinga,
ka namsau in satak a nawmvalh ding hi;
tuate pen a kithatte le salte sisan,
gal makaite lutangte hi ding hi,” a ci hi. ^as
43 Minamte aw, amah in a nasemte sisan phu la-in ^at
a galte tungah phu la dinga,
a gam le a mite adingin thoihdamna bawl ding ahi manin,
ama mite tawh ^{▼▼32.43 Ahikeh minamte aw, ama mite lungnuamsak un
,} ^{▼▼32.43 Masoretic Bupi; Si Tuipi Laizial (Septuagint zong en in) mipite / tuateh vansawltak khempeuh in amah bia uh hen} lungdam un. ^aw

44 Moses in Nun’ tapa Joshua ^{▼▼32.44 Hebrew Hoshea, Joshua tawh kilamdang lo} tonpih in hih la kammal khempeuh mipite zakin a suut hi. 45 Moses in Israel khempeuh tungah hih lamalte khempeuh a suut a man ciangin 46 amaute tungah, “Note in na tate uh tungah hih thukham kammalte khempeuh limtaka a man nading uh thu na piak theih nadingun tuni-a no tungah cihtakpi-a kong suutkhiat kammal khempeuh na lungsim uhah vom cinten un. 47 Note adingin tuate thu mawkmawk lel hi lo hi - na nuntakna uh ahi hi. Jordan gal kah a na neih ding uh gamah tuate hangin sawtpi na nungta ding uh hi,” a ci hi. ^ay

Moses Sih nading Nebo Vum

48 Tua ni mah in TOPAin Moses kiangah, 49 “Jericho gal Moab gam sunga om Abarim Mualdungpi a Nebo Vum ah pai to inla Israel-ten tanga a neih ding uh ka piak nading Canaan gam gal-et in. 50 Tua na kahtohna mualdawn ah nang na si dinga, na sanggampa Aaron, Hor Vum ah si-in a mipihte kiangah a kigawm bangin, nang zong na mipihte kiangah hong kigawmkhawm ding hi. 51 Hih in Zin Sehnel-gam sunga om Meribah Kadesh tuite ah na nih un Israel-te muh in kei tungah na muanhuai kei uh a, nang in Israel-te lakah ka sianthona na letkip loh hang ahi hi. 52 Tua ahi ciangin tua gam na galmuh bek dinga; Israel mite ka piak ding gamah na lut kei ding hi,” ci-in a gen hi. ^az